Laurdag 10. september blei ein historisk dag for Molde domkyrkje. Regnbogemessa, som feirar mangfald og ikkje-heterofil kjærleik, blei halden for første gong her. Arrangementskomiteen som fekk messa i gang, består av Molde sokneråd, Open folkekyrkje, Molde KFUK-KFUM og Bjørnsonfestivalen.
- Det var eit godt oppmøte, og det var veldig kjekt å sjå. Det var og ei veldig samansett forsamling. Og for eit viktig arrangement! Regnbogen har alle fargar, og det er eit passande symbol på at det også skal vere plass for alle i kyrkja. Derfor var dette eit viktig arrangement. Det er ei stadfesting på at homofile høyrer til i kyrkja. Om det er ein stad du skal kunne få leve som deg sjølv i lyset, så må det vere her, seier Margaret Mørk, som er leiar av Molde kyrkjelydsråd og leiar av arrangørkomiteen.